۱۲ تیرما گیلکی برابر با ۲۶ آبان هجریˇ شمسی

ایمروز برابر با دوتا رویداد ، اولی درگذشت ابراهیم پور داوود سالˇ ۱۳۴۷ ه .ش و دومی تولد محمد شمس لنگرودی سالˇ ۱۳۲۹ ه.ش .

ابراهیم پورداوود ، ۱۲۶۴ ه.ش (امیدوارم ئی نفر پیدا به ا تاریخانˇ به گیلکی واگردانه) رشتˇ محلیه سبزه میدان مئن به دونیا بومو . اونˇ پئر حاجی داوود زمین دار و بازرگان بو  اونˇ مارم حاجی ملاحسن خمامی زای بو . ابراهیم بعد مکتب خانه به مدرسیه حاجی حسن که سبزه میدانˇ صالح آبادˇ بازارچه مئن نهابو بوشو ، هه زمات جا خو شعر گوفتنا شوروع بوگوده و خو تخلصا "لسان" اینتخاب بوگود .سالˇ ۱۲۸۴ ه .ش خو برار و خو اوستاد امرا بوشو تئران ، و شوروع به یادگیری طب بوگود بعد چندی به بیروت بوشو  و فرانسه ادبیاتا یاد بیگیته هه زمات مئن خو فامیلیا "پورداوود" بنا و اونه خاندان  گیلان مئن خوشان فامیلیا "داوودزاده" بناده .

بعد دوسال و نیم واگردسته رشت . مردادˇ ۱۲۹۳ بوشو فرانسه و رشتیه حقوقا بخواند . پور داوود دو نفر دیگر ایله جار امرا پاریس مئن هفته نامیه "ایرانشهر" را تاودا .

جنگ جهانی اول مئن بوشو بغداد و روزنامیه " رستاخیز " مونتشرا گوده ولی اینتشار ا روزنامه ممنوع ببو و پورداوود کوچ بوگود به برلن و تا تمانا بستن جنگ اویه بئسا . پورداوود بعد ان که واگردسته ایران باز ئیته مسافرت به هند بوگود و بخشانی جی ادبیات مزدیسنا و گزارش اوستایا مونتشرا گوده.

پورداوودا به عونوان بنیانگذار  ایران شناسی ایران مئن ، و به عونوان کسی که زوانˇ ایران باستانا زنده گوده شناسده هطو پورداوود اولین کسی بو که اوستایابه فارسی زوان واگردانه .

پورداوود شعر ، بینیویشته و کیتابانˇ زیادی خودش جا به یادگار بنا .

 ------------------------

محمد شمس لنگرودی

سالˇ ۱۳۲۹ هجری شمسی لنگرود مئن به دونیا بومو و شعر گوتنˇ دهه پنجاه جا شورو بوگوده. اونˇ شعر دفتر "رفتار تشنگی" سالˇ 1355 مونتشر ببوسته، اما خودش بعد اینتشار کیتابˇ "خاکستر و بانو" و "جشن ناپيدا" دهه شصت وسطان مئن معروفا بو. محمد شمس لنگرودی دانشگا مئن تاريخ هونر درس دهه. "پنجاه و سه ترانه عاشقانه" مجموع شعران پنجاه و سه سالگی اونه.

امی چشم روشن امی سیمای گیلانم بعد مودتها اونه برنامان ماهواره ای ببسته چقد ذوق زده ببستیم اما . تا هسا چن بار ا کارا عقب تاودا بود یهو بی خبر اعلام ببسته شبکه اوستانی ماهواره ای ببو . اما که به نوبه خودمان  هم خوشحالا بستیمی هم ان که الان دو روزه ذوق مرگ ببستیم . ا ماهواره ای بون اماره خیلی خوب ببسته اما که خیلی امی اوستان جا دوریم اوشانی که گیلان جا دورده دانده من چی گم ئیته کلان شهر چن میلیونی مئن وختی ناتانی ایته هم زوان بیاجی ، ئیته غریبه جا وختی ئیته هم شهریا دینی ذوق زده بی ، وختی ارزو کونی ئی نفره امرا دوکلام گیلکی گب بزنی گوش گودن اخبار گیلکی هرشب ئیته صفای دیگری داره .

ناقلن هر روز ئیته سر به امی اوستان زنیم اونه فیلمان ، اونه شهری گزارشان و... دینیم خاب ادم دیل وازا به . هر چن دانم اوشانی که گیلان مئن ئیساده شاید می دیده ندارن بالاخره ادم آب ورجه بئسه احساس تشنگی نوکونه .

همه ا حرفان امرا با بیدینیم امی صاب خانه رضایت دهه اما دیش (استغفرالله) بنیم یا نه !!